كيف تميّز متجرك الإلكتروني من بين آلاف المتاجر اللي تشتغل بنظام الدروبشيبنق؟

رهف

الفئة: التجارة بدون مخزون

كثير مننا عنده متجر الكتروني، لكن المشكلة الأكبر تكون في تمييز المتجر بمنتجات تُشهد له وتشيد فيه. هنا السؤال الأهم: كيف تقدر تحقق هذا التميّز إذا كنت تبيع منتجات يتاجر فيها آلاف غيرك مع اختلاف نسب أرباحهم؟

عيد النظر في المنتج

قبل كل شيء، اسأل نفسك: 

• هل المنتج اللي تقدمه يناسب السوق وعليه طلب عالي؟ 

• هل يلبي احتياجات عملائك؟

• هل يعطيهم القيمة اللي يدورون عليها؟

إذا كانت إجابتك “نعم”، فهذا يعني إنك على الطريق الصحيح لاختيار المنتج المناسب، وبالتالي تقدر تبرز فيه عن المنافسين. أما إذا كانت إجابتك “لا”، فخلنا نتعمق أكثر..

يقولك الخبير والمستشار في إدارة المنتجات دان اولسن: "إن فهم احتياجات العملاء وتلبيتها بشكل أفضل من البدائل هو الطريق الأفضل لتحقيق النجاح".

ووضح أن مفهوم "ملاءمة المنتج للسوق" (Product Market-Fit)، مو مجرد فكرة عابرة، هو الأساس اللي يبني عليه نجاح أي متجر إلكتروني، خاصة لو كنت تبيع منتجات مشابهة لمنتجات متاجر ثانية في عالم الدروبشيبنق.

عشان كذا ابتكر نموذج فعّال تقدر من خلاله تقيّم إذا منتجك مناسب للسوق أو لا، وهو هرم المنتج المناسب للسوق -  Product Market-Fit:

 يتكوّن هذا الهرم من خمس مراحل أساسية:

1. العميل المستهدف (Target Customer): حدد من هم العملاء اللي تبي تخدمهم، وافهم احتياجاتهم بشكل دقيق.

2. الاحتياجات الغير مخدومة (Underserved Needs): اعرف وش هي احتياجاتهم بالضبط؟ بحيث تكون حاجة السوق ما غطاها أو ما حد طورها بشكل كافي.

3. عرض القيمة (Value Proposition): اعرض الفرق بين منتجك والمنتجات الموجودة بالسوق.

4. مجموعة الميزات (Feature Set): حدد المميزات اللي يتفرد فيها منتجك عن غيره وابرز قيمته. 

5. تجربة المستخدم (User Experience): حسّن تجربة العميل وهو يستخدم المنتج، عشان تكون سهلة وجذابة وبنفس الوقت تزيد من رضاه.

وش بيساعدك فيه هرم المنتج المناسب للسوق؟

• بتحدد الفجوات الموجودة في السوق.

• بتتأكد إذا كان منتجك يلبي احتياجات العملاء.

• بتبرز القيمة اللي تميّز منتجك.

• بتعرف كيف تطور تجربة العملاء باستمرار.

خلنا نقول إنك صاحب متجر إلكتروني يبيع إكسسوارات الجوال بنظام الدروبشيبنق. لاحظت إن العملاء يطلبون حامل جوال مغناطيسي يكون ثابت وقوي، لكن المنتجات الموجودة بالسوق ما تغطي هذا الاحتياج بشكل كامل. هنا قررت تتواصل مع المورد وتطلب حامل مطوّر بمغناطيس أقوى وتصميم يناسب السيارات الصغيرة. النتيجة؟

• المنتج الجديد جذب العملاء؛ لأنك قدمت قيمة إضافية تغطي احتياج واضح وغير مخدوم.

• المبيعات ارتفعت؛ لأن العملاء شافوا فرق واضح بين منتجك والمنتجات العادية.

بالمختصر المفيد، إذا ركزت إنك تفهم احتياجات عملائك ولبيتها بشكل أفضل من البدائل الموجودة بالسوق، بتكون أقرب للناس ومنتجك أنجح من غيره. ليش؟ لأنه ببساطة من اهتماماتهم ويناسبهم أكثر، وهذا بالضبط اللي يساعدك تبرز وتنجح في عالم الدروبشيبنق. وش رايك؟ فكرت تطبق هذا النموذج على منتجات متجرك؟